ایتھنز : (ویب ڈیسک) یونان میں ایک بیوی نے چیٹ جی پی ٹی کی باتوں پر یقین کر کے شوہر سے طلاق لینے کیلئے درخواست دائر کر دی۔یونان سٹی ٹائمز کے مطابق یونانی خاتون نے ٹیسیوگرافی پر جدید طریقہ کار کیلیے چیٹ جی پی ٹی کا استعمال کیا جو کہ مستقبل کی پیشگوئی کرنے کیلئے گراؤنڈز کو پڑھنے کا قدیم طریقہ ہے۔12 سال سے شادی شدہ اور دو بچوں کی ماں نے اپنی اور شوہر کے کافی کپ کی تصاویر اپ لوڈ کیں اور چیٹ جی پی ٹی سے ان کی تشریح کرنے کو کہا، اس پر چیٹ جی پی ٹی نے دعویٰ کیا کہ اس کے شوہر کی ایک کم عمر لڑکی کے ساتھ دوستی ہے اور وہ اپنی شادی ختم کرنا چاہتا ہے۔مقامی ٹی وی چینل سے گفتگو میں شوہر نے اپنی بیوی اور چیٹ جی پی ٹی کے دعوؤں کو مسترد کرتے ہوئے کہا کہ میں اسے مذاق سمجھ رہا تھا لیکن بیوی نے سنجیدہ لے لیا، اس نے مجھے چھوڑنے کو کہا اور بچوں کو بتایا کہ ہماری طلاق ہو رہی ہے، پھر مجھے ایک وکیل کا طلاق کیلئے فون آ گیا۔خاتون نے باہمی علیحدگی پر غور کرنے سے انکار کرتے ہوئے صرف تین دن بعد باضابطہ طور پر طلاق کیلئے اب عدالت میں درخواست دائر کر دی۔شوہر کے وکیل نے واضح کیا ہے کہ اے آئی کی پیش گوئی کسی بھی قانونی فورم پر ناقابلِ قبول ہے، جب تک الزام ثابت نہ ہو، مؤکل بے گناہ ہے۔
