دبئی (ویب ڈیسک) – فلسطینی ماڈل ندین ایوب نے اعلان کیا ہے کہ وہ رواں برس نومبر میں تھائی لینڈ کے شہر پاک کریٹ میں ہونے والے مس یونیورس 2025 کے 74ویں ایڈیشن میں فلسطین کی نمائندگی کریں گی۔ یہ پہلا موقع ہوگا کہ فلسطین سے کوئی ماڈل اس عالمی مقابلے میں شریک ہوگی۔
ندین ایوب نے انسٹاگرام پر اپنے پیغام میں کہا کہ:
“میں مس یونیورس کے اسٹیج پر صرف ایک اعزاز کے ساتھ نہیں بلکہ ایک سچائی کے ساتھ قدم رکھ رہی ہوں۔ جب فلسطین، خاص طور پر غزہ، دکھ اور صدمے سے گزر رہا ہے، میں اپنی قوم کی وہ آواز بن کر آئی ہوں جو خاموش ہونے سے انکار کرتی ہے۔”
انہوں نے مزید کہا کہ وہ ہر فلسطینی عورت اور بچے کی نمائندگی کر رہی ہیں، جن کی استقامت، امید اور حوصلہ دنیا کو دیکھنے کی ضرورت ہے۔
ندین ایوب اس وقت دبئی میں مقیم ہیں اور وہ ایک فٹنس کوچ اور غذائی ماہر کے طور پر جانی جاتی ہیں۔ انہوں نے 2022 میں منیلا میں منعقدہ مس ارتھ مقابلے میں “مس ارتھ واٹر” کا اعزاز اپنے نام کیا تھا۔ یہ اعزاز جیتنے والی وہ پہلی فلسطینی خاتون تھیں۔
انہیں 2022 میں مس فلسطین کا تاج بھی پہنایا گیا، جبکہ وہ اولیو گرین اکیڈمی کی بانی بھی ہیں، جو ایک ایسا تعلیمی پلیٹ فارم ہے جو پائیداری کو مصنوعی ذہانت کے ساتھ جوڑ کر مواد تخلیق کرنے کی تربیت فراہم کرتا ہے۔
