اسلام آباد: فیڈرل بورڈ آف ریونیو (ایف بی آر) نے مالی سال 2025-26 کے ابتدائی دو ماہ (جولائی اور اگست) میں تنخواہ دار طبقے سے 85 ارب روپے انکم ٹیکس جمع کرلیا، جو گزشتہ سال کے مقابلے میں 21 فیصد زیادہ ہے۔
اعدادوشمار کے مطابق گزشتہ سال اسی عرصے میں 70 ارب روپے ٹیکس وصول کیا گیا تھا، اس طرح رواں مالی سال کے ابتدائی دو ماہ میں 15 ارب روپے کا اضافہ ریکارڈ کیا گیا۔
تفصیلات کے مطابق:
- نان کارپورٹ ملازمین نے 41 ارب روپے ٹیکس ادا کیا۔
- کارپورٹ ملازمین کی جانب سے 20 ارب روپے جمع ہوا۔
- صوبائی سرکاری ملازمین نے 10.5 ارب روپے اور وفاقی ملازمین نے 7.6 ارب روپے انکم ٹیکس دیا۔
- بڑے پنشنرز پر نئے ٹیکس سے صرف 18 کروڑ روپے حاصل ہوئے۔
ایف بی آر کی رپورٹ کے مطابق گزشتہ مالی سال میں ملازمت پیشہ افراد سے 555 ارب روپے ٹیکس وصول کیا گیا تھا، جو ایک سال میں 188 ارب روپے زیادہ تھا۔
مزید برآں، جائیداد کے شعبے میں بھی نمایاں تبدیلی دیکھنے میں آئی:
- پلاٹوں کی فروخت پر ٹیکس وصولی 92 فیصد بڑھ کر 28 ارب روپے تک جا پہنچی۔
- جائیداد کی خریداری پر ٹیکس وصولی 12 فیصد کمی کے بعد 13 ارب روپے رہ گئی۔
ادھر ایف بی آر اگست میں مقررہ 951 ارب روپے کے ہدف کے مقابلے میں صرف 901 ارب روپے جمع کرسکا، جس سے 50 ارب روپے کی کمی ریکارڈ ہوئی۔
جولائی اور اگست میں مجموعی ہدف 1698 ارب روپے تھا لیکن صرف 1663 ارب روپے جمع ہوسکے، یوں 35 ارب روپے کا شارٹ فال سامنے آیا۔
رپورٹ میں بتایا گیا کہ رواں مالی سال کے لیے ٹیکس وصولی کا مجموعی ہدف 14 ہزار 131 ارب روپے مقرر کیا گیا ہے۔
