کراچی: وفاقی وزیر خزانہ محمد اورنگزیب نے کہا ہے کہ بلیو اکانومی پاکستان کی معیشت کے لیے ایک گیم چینجر ثابت ہوگی اور ملک کو پائیدار ترقی کی نئی راہ پر گامزن کرے گی۔
وزیر خزانہ نے یہ بات پاکستان انٹرنیشنل میری ٹائم ایکسپو اینڈ کانفرنس 2025 سے ورچوئل خطاب کرتے ہوئے کہی۔ ان کا کہنا تھا کہ پاکستانی معیشت درست سمت میں گامزن ہے اور حکومت بنیادی معاشی اصلاحات کے ایجنڈے پر عمل کر رہی ہے جو مستحکم ترقی کے لیے ناگزیر ہیں۔
محمد اورنگزیب نے کہا کہ حکومت نے گزشتہ ڈھائی سال میں معاشی استحکام کے لیے ٹھوس اقدامات کیے ہیں، جس کے نتیجے میں افراطِ زر اور پالیسی ریٹ میں نمایاں کمی آئی ہے۔
انہوں نے مزید بتایا کہ تین گلوبل ریٹنگ ایجنسیز نے پاکستان کے معاشی اقدامات کو سراہا ہے۔
وفاقی وزیر خزانہ نے کہا کہ تجارت اور معیشت کے استحکام کے لیے دوست ممالک کا تعاون حاصل ہے۔ انہوں نے بتایا کہ کراچی، گوادر اور پورٹ قاسم کی بندرگاہوں کو جدید خطوط پر استوار کرنے کے اقدامات کیے جا رہے ہیں۔
محمد اورنگزیب نے کہا کہ وزارتوں کے درمیان بہترین ہم آہنگی کے باعث ترقی کی رفتار تیز ہو رہی ہے اور وزارت خزانہ ملکی معیشت کے استحکام کے لیے ہر ممکن تعاون جاری رکھے گی۔
