کراچی: پاکستان کے عالمی شہرت یافتہ گلوکار عاطف اسلم نے انٹرویو دینے کے لیے بھاری معاوضہ لینے کی خبروں کی واضح وضاحت کر دی ہے۔ ایک حالیہ انٹرویو میں انہوں نے اپنی ذاتی زندگی، کامیابی اور میڈیا سے متعلق رویے کے بارے میں کھل کر گفتگو کی۔
عاطف اسلم کا کہنا تھا کہ وہ اب ایسے مقام پر پہنچ چکے ہیں جہاں ہر شو میں جا کر بیٹھنے کی ضرورت محسوس نہیں کرتے۔ انہوں نے کہا کہ اگر کوئی یہ دعویٰ کرتا ہے کہ وہ انٹرویو کے بدلے بھاری رقم لیتے ہیں، تو اصل میں وہ شخص خود چاہتا ہے کہ دنیا اسے نوٹ کرے۔
گلوکار نے واضح کیا کہ اللہ نے انہیں بے حد عزت دی ہے، اور اگر وہ مصروفیات کی وجہ سے کسی پروگرام میں شریک نہ ہو سکیں تو اس پر باتیں ضرور بنتی ہیں، مگر وہ اس کا جواب دینا ضروری نہیں سمجھتے۔
عاطف اسلم نے انسانی رویوں کے بارے میں بات کرتے ہوئے کہا کہ لوگ تب تک اچھے رہتے ہیں جب تک ان کا کام نکل رہا ہوتا ہے، بصورتِ دیگر رویے بدل جاتے ہیں۔ انہوں نے کہا کہ یہ ہمیشہ تکبر نہیں ہوتا کیونکہ ’’تکبر انسان پر جچتا ہی نہیں‘‘۔
کامیابی کے حوالے سے بات کرتے ہوئے عاطف اسلم نے بتایا کہ وہ 18 برس کی عمر سے ہی دنیا کو فتح کرنے کا جذبہ رکھتے تھے۔ ان کے مطابق مداحوں نے ہمیشہ حیران کن محبت دی جس نے انہیں آگے بڑھنے کا حوصلہ دیا۔
انہوں نے مزید کہا کہ انسان کامیابی کی دوڑ میں بہت سے اہداف مقرر کرتا ہے لیکن جب وہ حاصل ہو جاتے ہیں تو احساس ہوتا ہے کہ یہ سب کچھ بھی نہیں۔ ’’ایک وقت آتا ہے جب رکنا ضروری ہوتا ہے، ورنہ دوڑ جاری رہتی ہے اور انسان وہ لطف بھی نہیں لے پاتا جو اس نے کمایا ہے۔‘‘
