لندن: وزیراعظم شہباز شریف نے وفاقی وزراء کو ہدایت دی ہے کہ پاکستان میں سرمایہ کاری اور تجارت کے فروغ کے لیے تمام اہم شعبوں میں قابل عمل منصوبے تیار کیے جائیں۔
لندن سے زوم پر ہونے والے اجلاس کی صدارت کرتے ہوئے وزیراعظم نے کہا کہ زراعت، آئی ٹی، معدنیات، ٹورزم اور قابل تجدید توانائی وہ کلیدی شعبے ہیں جہاں غیر ملکی سرمایہ کاری لائی جا سکتی ہے۔ انہوں نے کہا کہ سرمایہ کاری کے ساتھ ساتھ تجارت کے فروغ سے برآمدات میں نمایاں اضافہ ممکن ہے۔
وزیراعظم نے واضح کیا کہ وزارتوں کو ٹارگٹ دیے گئے ہیں اور زیر تکمیل منصوبوں کو بروقت مکمل کرنے کے لیے تمام وسائل استعمال کیے جائیں۔ قابل عمل منصوبوں کی نشاندہی اور ان پر فوری عملدرآمد کی ضرورت پر زور دیا گیا۔
شہباز شریف نے کہا کہ مستقبل کو مدنظر رکھتے ہوئے ایک جامع روڈ میپ اور تبدیلی کا ایجنڈا بنایا جائے تاکہ اہداف کے حصول کو منظم انداز میں یقینی بنایا جا سکے۔ انہوں نے نجی شعبے کے کلیدی کردار کو بھی اجاگر کیا اور کہا کہ جاری معاشی اور اقتصادی اصلاحات معیشت کو نئی سمت دے رہی ہیں۔
اجلاس میں وفاقی وزراء مصدق ملک، علی پرویز ملک، محمد جہانزیب، جام کمال، عطا اللہ تارڑ اور احد خان چیمہ شریک ہوئے۔
