ٹورنٹو: (ویب ڈیسک) دنیا میں ایسے لوگ کم نہیں جو ناقابلِ یقین کارنامے انجام دے کر سب کو حیران کر دیتے ہیں۔ ایسا ہی کچھ کینیڈا کے سوشل میڈیا اسٹار جان فرگوسن نے کیا، جنہوں نے اپنی کم قامت کے باوجود بڑا ریکارڈ قائم کر دیا۔
غیر ملکی میڈیا کے مطابق جان فرگوسن جن کا قد صرف 4 فٹ 1.2 انچ ہے، نے برطانیہ کے خراب موسم، تیز ہواؤں اور بارش کے دوران خطرناک اسٹنٹ کرتے ہوئے ہزاروں فٹ بلندی پر اڑتے جہاز کی چھت پر کھڑے ہو کر سفر کیا۔
انہوں نے 100 میل فی گھنٹہ کی رفتار سے اڑتے جہاز پر کھڑے رہتے ہوئے 2010 میں برطانیہ کے 4 فٹ 1.7 انچ کے کرن کا عالمی ریکارڈ توڑ دیا اور دنیا کے سب سے چھوٹے وِنگ واکر بن گئے۔
27 سالہ فرگوسن نے ریکارڈ قائم کرنے کے بعد کہا کہ “میں توقع نہیں کر رہا تھا کہ طیارہ اتنی تیز رفتاری سے چلے گا، بارش کے ساتھ ساتھ ہوا کا دباؤ بہت زیادہ تھا، میرے چہرے پر پانی کی لاکھوں بوندیں پڑ رہی تھیں۔”
انہوں نے مزید کہا کہ ان کی اگلی منزل پیرا گلائیڈنگ اور اسکائی ڈائیونگ میں نئے عالمی ریکارڈز قائم کرنا ہے۔
