کراچی: پاکستان کے خلائی تحقیقاتی ادارے سپارکو نے ورلڈ اسپیس ویک 2025 کی تقریبات کا باقاعدہ افتتاح کر دیا۔
افتتاحی تقریب سپارکو کمپلیکس کراچی میں منعقد ہوئی جس میں خلائی سائنس، سیٹلائٹ ٹیکنالوجی اور ماحولیاتی تبدیلیوں سے متعلق سرگرمیوں کو اجاگر کیا گیا۔
اس سال عالمی تھیم “Living in Space” رکھا گیا ہے، جس کے تحت انسانی خلائی زندگی، خلائی پرواز اور مائیکرو گریویٹی پر خصوصی توجہ دی جا رہی ہے۔
تقریب کے مہمانِ خصوصی ممبر اسپیس ٹیکنالوجی علی کامران تھے۔ افتتاحی خطاب میں ڈی جی سپارکو محمد افتخار بھٹی نے خلائی تحقیق کی قومی و بین الاقوامی اہمیت پر روشنی ڈالی اور نوجوان نسل کو سائنسی میدان میں آگے بڑھنے کی تلقین کی۔
سپارکو نے تقریب میں قدرتی آفات اور سیلاب کی پیشگوئی کیلئے سیٹلائٹ ٹیکنالوجی پر بریفنگ دی جبکہ ڈائریکٹر اے آئی اوزیر انصاری نے انسانی خلائی پرواز کے حوالے سے پاکستان کی تازہ پیش رفت بیان کی۔
طلبہ کی تخلیقی کارکردگیوں کو سراہتے ہوئے “Lunar City” پوسٹر مقابلہ بھی منعقد کیا گیا، جبکہ ٹیبلو اور نمائش میں بچوں کے فن پاروں کو نمایاں مقام حاصل ہوا۔
مزید برآں سپارکو نے ڈاؤ فلائی ریسرچ لیب کو 2D کلائنو سٹیٹ فراہم کیا، جو مائیکرو گریویٹی کے تجربات میں اہم کردار ادا کرے گا۔
ورلڈ اسپیس ویک کی تقریبات ایک ہفتے تک جاری رہیں گی، جن میں سائنسی نمائشیں، ورکشاپس اور لیکچرز شامل ہوں گے۔
