ممبئی:
بھارتی فلم انڈسٹری کے معروف ہدایتکار اور مصنف ابھینو کشیپ نے انکشاف کیا ہے کہ ان کے اور بالی ووڈ سپر اسٹار سلمان خان کے بھائی ارباز خان کے درمیان تعلقات خوشگوار نہیں تھے، اور فلم “دبنگ” کی شوٹنگ کے دوران وہ ارباز سے ناخوش تھے۔
بھارتی میڈیا رپورٹس کے مطابق، ابھینو کشیپ کا کہنا ہے کہ سلمان خان نے فلم دبنگ میں ارباز خان کے کئی مناظر جان بوجھ کر حذف کروا دیے کیونکہ وہ نہیں چاہتے تھے کہ اسکرین پر ارباز کا کردار نمایاں ہو۔
ہدایتکار نے مزید دعویٰ کیا کہ فلم کے سیٹ پر دونوں بھائیوں کے درمیان تلخ کلامی بھی ہوئی تھی، اور سلمان خان نے فلم کے فوکس میں صرف خود کو نمایاں رکھنے کی کوشش کی۔
ابھینو کشیپ نے ایک اور سنگین الزام لگاتے ہوئے کہا کہ سلمان خان نے مبینہ طور پر فلم کے ایڈیٹر کو اغوا کر کے دبنگ کے فائنل کٹ پر مکمل کنٹرول حاصل کرنے کی کوشش کی تھی۔
یاد رہے کہ 2010 میں ریلیز ہونے والی فلم دبنگ نے باکس آفس پر شاندار کامیابی حاصل کی تھی، تاہم ہدایتکار اور سلمان خان کے درمیان اختلافات اسی دوران پیدا ہوئے۔
ابھینو کشیپ ماضی میں بھی سلمان خان اور ان کے خاندان پر کئی سنگین الزامات لگا چکے ہیں، البتہ خان خاندان کی جانب سے اب تک کوئی باضابطہ ردِعمل سامنے نہیں آیا۔
