پاکستان کے معروف میزبان اور انویسٹی گیٹو جرنلسٹ اقرار الحسن ایک بار پھر اپنی نجی زندگی کے باعث سوشل میڈیا پر موضوعِ گفتگو بن گئے ہیں۔
گزشتہ روز اقرار الحسن اور ان کی دوسری اہلیہ عروسہ خان کی شادی کی سالگرہ کی ایک تصویر وائرل ہوئی جس نے صارفین کی توجہ اپنی جانب مبذول کرلی۔ حیران کن طور پر اس تصویر میں اقرار کی پہلی بیوی قرۃالعین اقرار بھی موجود تھیں، جس پر مداحوں نے حیرت، دلچسپی اور بحث کا سلسلہ شروع کردیا۔
اقرار الحسن کی تین شادیوں کی خبریں اس سے قبل بھی سوشل میڈیا کی سرخیوں میں رہتی رہی ہیں۔ 2023 میں انہوں نے اپنی تیسری شادی کی باقاعدہ تصدیق کی تھی اور بتایا تھا کہ یہ نکاح پہلی بیوی قرۃالعین کی مرضی اور رضامندی سے ہوا تھا۔
اقرار کی دوسری اہلیہ عروسہ خان کا قرۃالعین اقرار اور اقرار کے بیٹے پہلاج الحسن کے ساتھ اچھا تعلق ہے، جس کا ذکر اقرار مختلف انٹرویوز میں کرتے آئے ہیں۔
حالیہ وائرل تصویر عروسہ خان نے اپنے سوشل میڈیا اکاؤنٹ پر شیئر کی جسے بعد میں اقرار الحسن نے بھی ری پوسٹ کیا۔ تصویر سامنے آتے ہی صارفین نے اس “غیرمعمولی فیملی بانڈنگ” پر دلچسپ اور تنقیدی تبصرے کیے—کچھ نے اسے مثبت مثال قرار دیا جبکہ کئی افراد نے شدید حیرت کا اظہار کیا۔
