ممبئی:بھارتی موسیقار اور گلوکار یویو ہنی سنگھ نے انکشاف کیا ہے کہ بالی ووڈ کنگ شاہ رخ خان نے ایک تقریب کے دوران سات گھنٹے تک ان کا ہاتھ تھامے رکھا اور انہیں فلم نگری کے بڑے ستاروں سے ملوایا۔
42 سالہ ہنی سنگھ کے مطابق “لنگی ڈانس” کی غیر معمولی کامیابی کے بعد شاہ رخ خان نے ایک شاندار دیوالی پارٹی کا اہتمام کیا، جہاں انہوں نے ہنی سنگھ کا ہاتھ پکڑے رکھتے ہوئے انہیں امیتابھ بچن، ایشوریہ رائے، مادھوری ڈکشت اور دیگر ممتاز فنکاروں سے متعارف کرایا۔ ہنی سنگھ نے کہا کہ یہ لمحہ ان کی زندگی کے یادگار ترین تجربات میں سے ایک تھا۔
انہوں نے مزید بتایا کہ شاہ رخ خان سے دوستی کی بنیاد ان کا دہلی کنکشن بنا، جبکہ کنگ خان نے ذاتی طور پر انہیں فون کرکے “لنگی ڈانس” تیار کرنے کی درخواست کی تھی۔
ہنی سنگھ نے اپنے بچپن کا حوالہ دیتے ہوئے کہا کہ وہ اسکول میں بھنگڑا، کیرتن اور مختلف سرگرمیوں میں حصہ لیتے تھے، اور ایک بار انہوں نے اپنے استاد سے کہا تھا کہ وہ بڑے ہو کر شاہ رخ خان جیسے بننا چاہتے ہیں۔
واضح رہے کہ یویو ہنی سنگھ اپنے نئے ورلڈ ٹور “My Story” کی تیاریوں میں مصروف ہیں۔ اس سے قبل وہ 2013-14 میں شاہ رخ خان کے ساتھ عالمی دورہ بھی کر چکے ہیں۔
