کراچی:معروف اداکارہ اور میزبان مشی خان نے سوشل میڈیا پر ان کے خلاف سخت زبان استعمال کرنے والے صارفین کو تنقید کا نشانہ بناتے ہوئے انہیں “گندی سوچ” کا حامل قرار دیا ہے۔
گزشتہ روز مشی خان نے ایک ویڈیو شیئر کی تھی جس میں انہوں نے سابق وزیراعظم عمران خان کی صحت سے متعلق گردش کرنے والی خبروں پر سرکاری سطح پر باقاعدہ معلومات فراہم کرنے کی درخواست کی تھی۔ تاہم اس ویڈیو کے بعد متعدد سوشل میڈیا صارفین نے انہیں بھارتی اور افغان میڈیا کی بے بنیاد افواہیں پھیلانے کا الزام دیا۔
جوابی ویڈیو میں مشی خان کا کہنا تھا کہ ان کے خلاف انتہائی نازیبا اور توہین آمیز الفاظ استعمال کیے گئے، جو قابلِ افسوس ہیں۔ انہوں نے کہا کہ سوشل میڈیا پر لوگ انسانیت کا مظاہرہ کریں اور کسی کے جذبات کا مذاق نہ بنائیں۔ ان کے مطابق معتبر اکاؤنٹس سے بھی ان کے بارے میں گھٹیا زبان استعمال کی گئی۔
مشی خان نے وضاحت کی کہ انہوں نے یہ ویڈیو جذباتی کیفیت میں بنائی تھی، کیونکہ سوشل میڈیا کھولتے ہی انہیں خبریں ملیں کہ عمران خان انتقال کر چکے ہیں، اور انہیں معلوم نہیں تھا کہ یہ تمام خبریں جھوٹے پروپیگنڈے کا حصہ ہیں۔
انہوں نے کہا کہ بعد ازاں ان کے خلاف کہا گیا کہ وہ ’اوور ایکٹنگ‘ کر رہی ہیں، جو سراسر غلط ہے۔ مشی خان نے کہا کہ “میں نے کوئی ایکٹنگ نہیں کی، لوگ کچھ بھی لکھنے سے پہلے سوچیں کیونکہ کسی کے احساسات سچے بھی ہو سکتے ہیں۔”
