کراچی:معروف ماڈل اور ٹی وی میزبان متھیرا فیشن شو میں ریمپ واک کے بعد شدید تنقید کا نشانہ بننے پر سامنے آگئیں اور انہوں نے سوشل میڈیا صارفین کے رویے کو سخت تنقید کا نشانہ بنایا۔
بولڈ انداز اور بے باک گفتگو کے باعث مشہور متھیرا ایک مرتبہ پھر سوشل میڈیا کی توجہ کا مرکز بن گئیں جہاں حالیہ شو کی ریمپ واک کی ویڈیو وائرل ہونے کے بعد صارفین نے ان کی واک اور جسمانی ساخت پر اعتراضات کیے۔ متعدد صارفین نے ان کے وزن میں اضافے پر تنقید کی، جب کہ کچھ کے مطابق وہ پہلے زیادہ دلکش نظر آتی تھیں۔
ایک صارف نے طنزیہ انداز میں لکھا کہ “اس سے بہتر واک تو میں کر لوں”، جبکہ کچھ نے توہین آمیز رویہ اختیار کرتے ہوئے انہیں “ملازمہ جیسی” قرار دیا۔
مسلسل منفی تبصروں کے جواب میں متھیرا نے اپنا مؤقف دیتے ہوئے کہا کہ لوگ بلاوجہ ان کے خلاف گھٹیا باتیں کر رہے ہیں، حالانکہ وہ صرف اپنی صحت اور خوشی پر توجہ دینے کی کوشش کر رہی ہیں۔ انہوں نے کہا کہ انہیں شو میں بطور ماڈل مدعو کیا گیا تھا اور انہوں نے کوئی نامناسب عمل نہیں کیا۔
متھیرا نے بتایا کہ ان کی گھٹنے کی سرجری ہو چکی ہے جبکہ تھائیرائڈ کی بیماری نے بھی انہیں کافی متاثر کیا، اس کے باوجود لوگ غیر ضروری تنقید کر رہے ہیں، جو افسوسناک ہے۔
آخر میں انہوں نے کہا:
“میں اپنی زندگی اپنے لیے جی رہی ہوں، اور فخر سے کہہ سکتی ہوں کہ میں ایک چھوٹی سوچ رکھنے والے معاشرے میں رہنے والی ’بڑی‘ لڑکی ہوں۔”
