کراچی:
پاکستان اسٹاک ایکسچینج میں آج ریکارڈ ساز تیزی دیکھنے میں آئی، جہاں بینچ مارک کے ایس ای 100 انڈیکس پہلی بار ایک لاکھ 71 ہزار پوائنٹس کی نفسیاتی حد کو عبور کر گیا۔
کاروباری ہفتے کے پہلے ہی دن مارکیٹ نے شاندار آغاز کیا، جب 997 پوائنٹس کی زبردست تیزی کے ساتھ انڈیکس بڑھ کر 170,862 پوائنٹس کی نئی بلند ترین سطح پر پہنچ گیا۔ بعد ازاں کاروبار کے دوران اتار چڑھاؤ جاری رہا، تاہم مجموعی رجحان مثبت رہا۔
مارکیٹ میں وقفے وقفے سے تیزی دیکھنے میں آئی اور انڈیکس 525 پوائنٹس کے اضافے کے ساتھ 170,389 پوائنٹس پر آ گیا، جس کے بعد مزید بڑھتے ہوئے 974 پوائنٹس کی تیزی سے 170,839 پوائنٹس کی سطح کو چھو گیا، جو اس وقت تک کی بلند ترین سطح تھی۔
بعد ازاں بازارِ حصص نے غیر معمولی رفتار پکڑی اور 1136 پوائنٹس کے ریکارڈ ساز اضافے کے ساتھ کے ایس ای 100 انڈیکس پہلی مرتبہ 171,000 پوائنٹس کی نفسیاتی حد عبور کرنے میں کامیاب ہو گیا۔
ماہرین کے مطابق پاکستان اسٹاک ایکسچینج کے لیے رواں سال غیر معمولی ثابت ہو رہا ہے۔ کے ایس ای 100 انڈیکس میں اب تک تقریباً 40 فیصد اضافہ ریکارڈ کیا جا چکا ہے، جو خطے کی بیشتر اسٹاک مارکیٹس کے مقابلے میں نمایاں طور پر بہتر کارکردگی ہے۔
تجزیہ کاروں کا کہنا ہے کہ معاشی استحکام، افراطِ زر میں کمی، مثبت سرمایہ کار اعتماد اور اصلاحاتی اقدامات نے مارکیٹ کی اس تاریخی تیزی میں اہم کردار ادا کیا ہے۔
