میلبرن: آسٹریلیا کے سابق ٹیسٹ کپتان اور کوچ باب سمپسن 89 سال کی عمر میں انتقال کر گئے۔ ان کے انتقال کی تصدیق کرکٹ آسٹریلیا نے کی۔
باب سمپسن نے 1957 سے 1978 تک 62 ٹیسٹ میچز کھیلے اور 4 ہزار 869 رنز بنائے جن میں 10 سنچریاں شامل ہیں۔ بطور لیگ اسپن بولر انہوں نے 71 وکٹیں بھی حاصل کیں، جبکہ انہیں کرکٹ کی تاریخ کے عظیم ترین سلپ فیلڈرز میں شمار کیا جاتا ہے۔
انہوں نے 1968 میں ریٹائرمنٹ لی لیکن 1977 میں ورلڈ سیریز کرکٹ تنازع کے دوران دوبارہ میدان میں اترے اور 41 برس کی عمر میں آسٹریلوی ٹیم کی کپتانی کی۔
بطور کوچ، باب سمپسن نے ایلن بارڈر کی قیادت میں آسٹریلوی ٹیم میں نظم و ضبط پیدا کیا جس کے بعد ٹیم نے 1987 ورلڈ کپ، ایشز اور فرینک وورل ٹرافی اپنے نام کی۔ لیجنڈری اسپنر شین وارن نے انہیں اپنا بہترین کوچ قرار دیا تھا۔
سمپسن نے آسٹریلیا کے علاوہ لنکاشائر، نیدرلینڈز اور بھارت کے ساتھ بھی بطور کوچ و کنسلٹنٹ خدمات انجام دیں۔
