لاہور: (ویب ڈیسک) متحدہ عرب امارات کی شدید گرمی نے ایشیا کپ کے منتظمین کو میچز کا وقت تبدیل کرنے پر مجبور کر دیا ہے۔
ذرائع کے مطابق اب ایشیا کپ کے میچز پہلے اعلان کردہ شیڈول سے آدھے گھنٹے بعد شروع ہوں گے تاکہ کھلاڑیوں اور تماشائیوں کو گرمی کے اثرات سے محفوظ رکھا جا سکے۔
تفصیلات کے مطابق 19 میں سے 18 میچز شام ساڑھے 6 بجے (مقامی وقت) پر کھیلے جائیں گے۔ 15 ستمبر کو ابوظہبی میں 2 مقابلے ہوں گے جن میں سے یو اے ای اور عمان کا ڈے میچ سہ پہر 4 بجے شروع ہوگا، جب کہ اسی شام سری لنکا اور ہانگ کانگ کی ٹیمیں بھی آمنے سامنے آئیں گی۔
ایونٹ کا سب سے بڑا مقابلہ پاک بھارت ٹاکرا 14 ستمبر کو ہوگا، جس کا کرکٹ شائقین بے چینی سے انتظار کر رہے ہیں۔
ایشیا کپ میں دونوں گروپس سے ٹاپ ٹو ٹیمیں سپر فور مرحلے میں پہنچیں گی، جہاں 20 سے 26 ستمبر کے درمیان 6 میچز ہوں گے۔ سپر فور کی ٹاپ 2 ٹیمیں 28 ستمبر کو فائنل میں ٹکرائیں گی۔
