اسلام آباد: وزیراعظم شہباز شریف نے غزہ میں امن کے لیے حماس کے ردعمل کا خیر مقدم کرتے ہوئے اسے جنگ بندی کی جانب ایک مثبت پیش رفت قرار دیا ہے۔
سماجی رابطے کی ویب سائٹ ایکس پر اپنے پیغام میں وزیراعظم نے کہا کہ حماس کے بیان سے جنگ بندی کی نئی راہ ہموار ہوئی ہے اور فلسطینی عوام پر ہونے والی نسل کشی کے آغاز کے بعد سے اب تک ہم امن کے سب سے قریب ہیں۔
شہباز شریف نے کہا کہ پاکستان ہمیشہ فلسطینی عوام کے ساتھ کھڑا رہا ہے اور ہمیشہ رہے گا۔ انہوں نے صدر ٹرمپ، قطر، سعودی عرب، متحدہ عرب امارات، ترکی، اردن، مصر اور انڈونیشیا کی قیادت کا شکریہ ادا کیا، جنہوں نے اقوام متحدہ کی جنرل اسمبلی کے 80 ویں اجلاس کے موقع پر فلسطینی مسئلے کے حل کے لیے ملاقات کی۔
وزیراعظم کا کہنا تھا کہ حماس کے جاری کردہ بیان نے جنگ بندی اور امن کے قیام کے لیے ایک موقع فراہم کیا ہے جسے ضائع نہیں ہونا چاہیے۔ پاکستان اپنے تمام برادر ممالک کے ساتھ مل کر فلسطین میں دائمی امن کے لیے کام کرتا رہے گا۔
دوسری جانب نائب وزیراعظم اور وزیر خارجہ اسحاق ڈار نے بھی حماس کے ردعمل کو خوش آئند قرار دیتے ہوئے کہا کہ اس اقدام کے نتیجے میں فوری جنگ بندی، فلسطینیوں کی تکالیف میں کمی، یرغمالیوں کی رہائی اور انسانی امداد کی بحالی یقینی بننی چاہیے۔
اسحاق ڈار نے مزید کہا کہ پاکستان فلسطینی عوام کی غیر متزلزل حمایت جاری رکھے گا اور 1967 سے پہلے کی سرحدوں پر ایک خودمختار فلسطینی ریاست کے قیام کے عزم کو دہراتا ہے، جس کا دارالحکومت القدس الشریف ہوگا۔
