گوہاٹی ( آوازنیوز)انڈیا نے جس افریقی کھیلاڑی کو بونا کہہ کر اپنی پست ذہنیت کا مظاہرہ کیا اس کی قیادت میں جنوبی افریقہ نے انڈیا کے خلاف ٹیسٹ سیریز 2-0 کے مارجن سے جیت لی۔ گوہاٹی میں کھیلے گئے دوسرے اور آخری ٹیسٹ میں افریقہ نے انڈیا کو 408 رنز کے بھاری بھرکم مارجن سے ہراکر کر 25 سال بعد انڈیا میں ٹیسٹ سیریز جیت لی۔ 12 ماہ سے کم عرصے میں انڈیا کو دوسری بار وائیٹ واش کی ہزیمت سے دوچار ہونا پڑا۔ مارکو جینن کی شاندار آل راؤنڈ پرفارمنس ، موتھا سامی کی شاندار سنچری اور سائمن ہارمن کے میچ میں 9 وکٹوں کے علاوہ ایڈن مارکم نے بحیثیت فیلڈر ریکارڈ 9 کیچز پکڑ کر انڈیا کو اپنی ہی سرزمین پر بدترین شکست دینے میں اہم کردار ادا کئے۔ مارکو جینن نے جنوبی افریقہ کی پہلی اننگز میں دھواں دھار 93 رنز کے ساتھ انڈیا کی پہلی اننگز میں 6 وکٹیں حاصل کیں۔ جنوبی افریقہ نے پہلی اننگز میں 489 جبکہ دوسری اننگز میں 5 وکٹوں پر 260 پر اننگز ختم کردی۔ سٹب نے 94 رنز سکور کئے۔انڈین ٹیم 201 اور 140 رنز ہی بنا پائی ۔ مارکو جینن کو مین آف دی میچ قرار دیا گیا۔ جبکہ سائمن ہارمن سیریز کے بہترین کھیلاڑی قرار پائے۔کول کتہ میں کھیلے گئے پہلے ٹیسٹ میں افریقہ کو 30 رنز سے کامیابی ملی تھی۔
