لاپاز، بولیویا:جنوبی امریکی ملک بولیویا میں کوپا بولیویا کپ کے میچ کے بعد شدید ہنگامہ آرائی ہوئی جسے روکنے کے لیے پولیس کو آنسو گیس کا استعمال کرنا پڑا۔ برطانوی میڈیا کے مطابق بلومنگ اور ریئل اورورو کے درمیان میچ 2-2 سے برابر رہا، تاہم مجموعی اسکور کی بنیاد پر بلومنگ کی ٹیم کوارٹر فائنل میں پہنچ گئی۔
میچ کے اختتام پر معمولی تلخی نے اچانک بڑے تصادم کی صورت اختیار کر لی، جس میں دونوں ٹیموں کے کھلاڑی اور اسٹاف شامل تھے۔ مقامی رپورٹس کے مطابق ریئل اورورو کے کھلاڑی سیباسٹین زیبالوس کو روکا گیا تو وہ خود کو چھڑاتے ہوئے مزید کھلاڑیوں کو دھکے دینے لگے۔
اسی دوران ان کے ساتھی جولیو ویلا نے بھی مشتعل ہو کر مکّے مارنے شروع کر دیے، جس سے صورتحال مزید خراب ہو گئی۔ اطلاعات کے مطابق ریئل اورورو کے کوچ مارسيلو روبلیدو بھی اس تنازعے میں ملوث ہوئے اور مبینہ طور پر جھڑپ کے دوران ایک قومی ٹیم کے اسٹاف رکن سے تکرار میں زمین پر گر پڑے۔
پولیس نے حالات قابو میں لانے کے لیے میدان میں مداخلت کی اور ہجوم کو منتشر کرنے کے لیے آنسو گیس کا استعمال کیا۔ واقعے کی تحقیقات جاری ہیں۔
