راولپنڈی:
پاکستان کے اسٹار بیٹر بابر اعظم نے ٹی ٹوئنٹی انٹرنیشنل میں ایک ناپسندیدہ ریکارڈ اپنے نام کر لیا، وہ صفر پر آؤٹ ہونے کے اعتبار سے عمر اکمل اور صائم ایوب کے ہم پلہ ہو گئے ہیں۔
سہ ملکی ٹی ٹوئنٹی سیریز کے آخری لیگ میچ میں سری لنکا نے پاکستان کو 6 رنز سے شکست دی۔ 185 رنز کے ہدف کے تعاقب میں پاکستان نے ابتدائی 29 رنز پر پہلی وکٹ گنوائی، جس کے بعد بابر اعظم کریز پر آئے، لیکن وہ دوسری ہی گیند پر بغیر کوئی رن بنائے پویلین لوٹ گئے۔
یہ بابر اعظم کا ٹی ٹوئنٹی انٹرنیشنل میں 10واں “ڈک” تھا۔ اس سے قبل وہ اسی سیریز کے پہلے میچ میں زمبابوے کے خلاف بھی صفر پر آؤٹ ہوئے تھے۔
یوں بابر اعظم، صائم ایوب اور عمر اکمل مشترکہ طور پر وہ پاکستانی بیٹر بن گئے ہیں جو ٹی ٹوئنٹی انٹرنیشنل میں سب سے زیادہ مرتبہ صفر پر آؤٹ ہوئے۔
- صائم ایوب: 55 میچز میں 10 بار
- عمر اکمل: 84 میچز میں 10 بار
- بابر اعظم: 135 میچز میں 10 بار
عالمی سطح پر یہ ریکارڈ سری لنکا کے ڈسن شناکا کے پاس ہے، جو 15 بار صفر پر آؤٹ ہو چکے ہیں۔
