آسٹریلیا کی ویمن کرکٹ ٹیم کی کپتان ایلیسا ہیلی نے بین الاقوامی کرکٹ سے ریٹائرمنٹ کا اعلان کر دیا ہے۔ وہ بھارت کے خلاف آئندہ ملٹی فارمیٹ سیریز کے بعد کرکٹ کے تمام فارمیٹس سے کنارہ کشی اختیار کریں گی۔
یہ سیریز فروری اور مارچ کے دوران کھیلی جائے گی جس میں تین ون ڈے اور ایک ٹیسٹ میچ شامل ہوگا۔ یہ سیریز ایلیسا ہیلی کے شاندار بین الاقوامی کیریئر کا آخری باب ہوگی۔
ایلیسا ہیلی آسٹریلیا کی جانب سے ٹی ٹوئنٹی کرکٹ میں سب سے زیادہ میچ کھیلنے والی دوسری خاتون کھلاڑی ہیں۔ بطور وکٹ کیپر بیٹر انہوں نے اپنی ٹیم کو متعدد تاریخی فتوحات دلوائیں اور عالمی سطح پر آسٹریلوی خواتین کرکٹ کو نئی بلندیوں تک پہنچایا۔
میگ لیننگ کی ریٹائرمنٹ کے بعد ایلیسا ہیلی نے آسٹریلوی ٹیم کی قیادت سنبھالی اور ان کی قیادت میں ٹیم نے کئی اہم سیریز اپنے نام کیں۔
کرکٹ حلقوں میں ان کی ریٹائرمنٹ کو خواتین کرکٹ کے ایک سنہری دور کے اختتام کے طور پر دیکھا جا رہا ہے۔
