گرم چائے اور کافی کو عموماً ذہنی سکون اور تازگی کا ذریعہ سمجھا جاتا ہے، تاہم طبی ماہرین نے خبردار کیا ہے کہ اگر یہ مشروبات حد سے زیادہ گرم حالت میں پینے کی عادت بن جائے تو یہ صحت کے لیے سنگین خطرات پیدا کر سکتی ہے، خصوصاً غذائی نالی کے کینسر کے امکانات میں نمایاں اضافہ ہو سکتا ہے۔
ماہرین کے مطابق اکثر افراد چائے یا کافی اس وقت نوش کرتے ہیں جب کپ سے بھاپ اٹھ رہی ہوتی ہے، مگر غذائی نالی معدے کے مقابلے میں نہایت باریک اور حساس عضو ہے، جو مسلسل شدید گرمی برداشت کرنے کے لیے قدرتی طور پر محفوظ نہیں۔ بار بار بہت زیادہ گرم مشروبات پینے سے گلے کی اندرونی سطح کو معمولی مگر مسلسل جلن کا سامنا کرنا پڑتا ہے، جو وقت کے ساتھ نقصان دہ ثابت ہو سکتی ہے۔
برطانیہ کے بائیو بینک میں کیے گئے ایک تفصیلی اور ریویو شدہ مطالعے میں انکشاف ہوا ہے کہ طویل عرصے تک انتہائی گرم چائے یا کافی پینے والوں میں غذائی نالی کے سرطان کا خطرہ نمایاں حد تک بڑھ جاتا ہے۔ تحقیق کے مطابق اس خطرے کی بنیادی وجہ مشروب کا زیادہ درجۂ حرارت ہے، نہ کہ اس میں شامل کوئی خاص کیمیکل یا جزو۔
مطالعے میں یہ بھی بتایا گیا کہ دنیا کے وہ ممالک جہاں لوگ عادتاً اُبلتے یا بہت گرم مشروبات پیتے ہیں، وہاں غذائی نالی کے کینسر کی شرح نسبتاً زیادہ پائی جاتی ہے۔ برطانیہ میں ہونے والی تحقیق نے بھی اس عالمی رجحان کی تصدیق کی ہے۔
ماہرین کا کہنا ہے کہ غذائی نالی میں معدے کی طرح مضبوط حفاظتی تہہ موجود نہیں ہوتی، اس لیے مسلسل جلن خلیوں کے رویے میں تبدیلی کا باعث بن سکتی ہے، جو وقت کے ساتھ کینسر کی شکل اختیار کر سکتی ہے۔ بڑے گھونٹ لینے سے خطرہ مزید بڑھ جاتا ہے کیونکہ گرم مشروب زیادہ دیر تک گلے کے ساتھ رابطے میں رہتا ہے۔
تحقیق کے مطابق روزانہ آٹھ یا اس سے زیادہ انتہائی گرم مشروبات پینے والوں میں خطرہ کئی گنا بڑھ جاتا ہے، تاہم کم مقدار میں بھی اگر مشروب بہت زیادہ گرم ہو تو نقصان کا خدشہ برقرار رہتا ہے۔ جدید تھرمل مگ جو مشروبات کو طویل عرصے تک گرم رکھتے ہیں، اس خطرے کو مزید بڑھا سکتے ہیں۔
طبی ماہرین مشورہ دیتے ہیں کہ چائے یا کافی پینے سے قبل اسے کچھ دیر ٹھنڈا ہونے دیا جائے، بھاپ نکلنے دی جائے یا دودھ اور تھوڑا سا ٹھنڈا پانی شامل کر کے درجۂ حرارت کم کیا جائے۔ ماہرین کے مطابق تقریباً 58 ڈگری سینٹی گریڈ پر مشروب پینا نسبتاً محفوظ سمجھا جاتا ہے۔
