واشنگٹن ٹائمز کے ایک تازہ آرٹیکل میں انکشاف کیا گیا ہے کہ سال 2025 پاک امریکا تعلقات کے لیے ایک فیصلہ کن اور انقلابی موڑ ثابت ہو رہا ہے۔ رپورٹ کے مطابق دونوں ممالک کے تعلقات محض وقتی تعاون سے نکل کر اسٹریٹجک شراکت داری کی جانب بڑھ چکے ہیں، جس کے اثرات خطے کی سیاست اور سلامتی پر واضح طور پر نظر آ رہے ہیں۔
آرٹیکل میں کہا گیا ہے کہ جنوبی ایشیا کے بدلتے ہوئے حالات، سکیورٹی تعاون میں اضافہ اور سفارتی روابط کی بحالی نے واشنگٹن کو پاکستان کے کردار پر نظرِ ثانی پر مجبور کیا۔ امریکی پالیسی ساز اب پاکستان کو ایک اہم اور قابلِ اعتماد شراکت دار کے طور پر دیکھ رہے ہیں، جس کے نتیجے میں باہمی اعتماد میں اضافہ ہوا ہے۔
واشنگٹن ٹائمز کے مطابق انسدادِ دہشت گردی، علاقائی استحکام اور اقتصادی تعاون کے شعبوں میں پیش رفت نے پاک امریکا تعلقات کو نئی سمت دی ہے۔ رپورٹ میں یہ بھی کہا گیا ہے کہ 2025 میں اعلیٰ سطحی روابط، عسکری و سفارتی ملاقاتیں اور مشترکہ مفادات پر اتفاق نے تعلقات کو مضبوط بنیاد فراہم کی۔
تجزیہ کاروں کے مطابق یہ پیش رفت نہ صرف دونوں ممالک کے لیے بلکہ پورے خطے کے امن و استحکام کے لیے اہم سمجھی جا رہی ہے، اور آنے والے دنوں میں پاک امریکا تعلقات مزید مضبوط ہونے کے امکانات ہیں۔
