کوٹ لکھپت جیل میں نو مئی کے ایک اور اہم مقدمے کا ٹرائل مکمل ہو گیا ہے، جس میں اے ٹی سی لاہور کی جانب سے آج فیصلہ سنائے جانے کا امکان ہے۔ یہ مقدمہ نو مئی کو گلبرگ کے علاقے میں گاڑیاں جلانے کے واقعے سے متعلق ہے۔
مقدمے کے ملزمان میں پاکستان تحریکِ انصاف کی سینئر رہنما ڈاکٹر یاسمین راشد، سابق صوبائی وزیر میاں محمود الرشید، اعجاز چوہدری، عمر سرفراز چیمہ سمیت دیگر شامل ہیں۔
عدالتی کارروائی کے دوران ڈاکٹر یاسمین راشد سمیت 33 ملزمان کے حتمی بیانات قلمبند کر لیے گئے، جبکہ استغاثہ کی جانب سے پیش کیے گئے تمام 41 گواہوں کے بیانات پر جرح بھی مکمل ہو چکی ہے۔
انسداد دہشت گردی عدالت کے جج ارشد جاوید نے کوٹ لکھپت جیل میں ٹرائل مکمل کیا۔ دورانِ سماعت عدالت نے چار ملزمان کو اشتہاری قرار دیا، جبکہ باقی ملزمان کے خلاف قانونی کارروائی حتمی مرحلے میں داخل ہو چکی ہے۔
عدالتی ذرائع کے مطابق مقدمے کا فیصلہ آج سنائے جانے کا امکان ہے، جس پر سیاسی و قانونی حلقوں کی نظریں مرکوز ہیں۔
