کراچی: بھارتی کرکٹ ٹیم کے کپتان روہت شرما نے ممبئی میں سرخ رنگ کی نئی لیمبورگینی یورس ایس ای خریدی ہے، جس کی قیمت تقریباً 4 کروڑ 57 لاکھ روپے (ایکس شو روم) بتائی جا رہی ہے۔
کار سے زیادہ شائقین کی توجہ اس کی منفرد نمبر پلیٹ “3015” نے کھینچی، جس کے پیچھے ان کے بچوں سے جڑی ایک خاص کہانی ہے۔ رپورٹ کے مطابق “30” ان کی بیٹی سامائرا کی سالگرہ 30 دسمبر کو ظاہر کرتا ہے جبکہ “15” ان کے بیٹے اہان کی سالگرہ 15 نومبر کی نمائندگی کرتا ہے۔ دلچسپ بات یہ ہے کہ 30 اور 15 کو جمع کرنے پر 45 بنتا ہے، جو روہت شرما کا جرسی نمبر ہے۔
اس سے قبل روہت کی پرانی کار کی نمبر پلیٹ 264 تھی، جو ون ڈے کرکٹ میں ان کا سب سے بڑا اسکور ہے۔ لیمبورگینی یورس ایس ای 800 ہارس پاور اور 950 نیوٹن میٹر ٹارک پیدا کرتی ہے، جبکہ صرف 3.4 سیکنڈز میں 0 سے 100 کلومیٹر فی گھنٹہ کی رفتار حاصل کر سکتی ہے۔
روہت شرما نے حال ہی میں آئی پی ایل میں ممبئی انڈینز کی نمائندگی کی تھی اور امکان ہے کہ وہ اکتوبر میں آسٹریلیا کے خلاف ون ڈے سیریز میں ایکشن میں نظر آئیں گے۔
