کراچی: پاکستان کے اوپنر امام الحق نے شاندار فارم جاری رکھتے ہوئے لگاتار دوسری سنچری اسکور کر کے اپنی کاؤنٹی ٹیم یارکشائر کو ون ڈے کپ میں فتح دلا دی۔
گروپ بی کے میچ میں یارکشائر نے لنکا شائر کو 7 وکٹوں سے شکست دی، 295 رنز کا ہدف 19 گیندیں قبل حاصل کیا۔ امام الحق نے 124 گیندوں پر 117 رنز بنائے اور ولی لکسٹن کے ساتھ 153 رنز کی شراکت قائم کی۔ لکسٹن نے 63 گیندوں پر 77 رنز اسکور کیے۔
لنکا شائر کی جانب سے مائیکل جونز نے 102 اور جارج بالڈرسن نے 70 رنز بنائے۔ امام الحق اس وقت ایونٹ کے ٹاپ رنز اسکورر ہیں، وہ اب تک 331 رنز بنا چکے ہیں۔
