کراچی: انگلینڈ نے ون ڈے کرکٹ کی تاریخ کی سب سے بڑی کامیابی حاصل کرلی۔ روز باؤل میں کھیلے گئے تیسرے اور آخری میچ میں انگلینڈ نے جنوبی افریقا کو 342 رنز کے بھاری مارجن سے شکست دی۔
انگلینڈ نے پہلے بیٹنگ کرتے ہوئے 415 رنز کا پہاڑ جیسا مجموعہ بنایا۔ جیکب بیتھل نے شاندار 110 رنز 82 گیندوں پر اسکور کیے، جو روٹ نے کلاسک 100 رنز (96 گیندیں) کی اننگز کھیلی، اوپنر جیمی اسمتھ نے 62 اور کپتان جوز بٹلر نے صرف 32 گیندوں پر جارحانہ 62 رنز جوڑ کر اسکور کو ناقابلِ تسخیر بنایا۔
ہدف کے تعاقب میں پروٹیز بیٹنگ لائن انگلش باؤلرز کے سامنے مکمل طور پر ناکام رہی اور پوری ٹیم صرف 72 رنز پر ڈھیر ہوگئی۔ کوربن بوش 20 رنز کے ساتھ ٹاپ اسکورر رہے، جبکہ کپتان ٹیمبا باووما انجری کے باعث بیٹنگ کے لیے نہ آسکے۔
انگلینڈ کے جوفرا آرچر نے تباہ کن بولنگ کرتے ہوئے 9 اوورز میں 18 رنز کے عوض 4 کھلاڑیوں کو پویلین کی راہ دکھائی۔ عادل رشید نے 3 اور برائیڈن کارس نے 2 وکٹیں حاصل کیں۔
یہ فتح ون ڈے کرکٹ کی تاریخ کا سب سے بڑا مارجن ہے۔ اس سے قبل سب سے بڑی کامیابی بھارت کے پاس تھی، جس نے 2023 میں سری لنکا کو 317 رنز سے ہرایا تھا۔ یہ انگلینڈ کی ون ڈے تاریخ کی بھی سب سے بڑی جیت ہے، جس نے 2018 میں آسٹریلیا کے خلاف 242 رنز کی کامیابی کا ریکارڈ توڑ دیا۔
دلچسپ امر یہ ہے کہ اس میچ میں ریکارڈ ساز جیت کے باوجود انگلینڈ سیریز اپنے نام نہ کر سکا۔ جنوبی افریقا نے سیریز 1-2 سے جیت لی، کیونکہ پہلے ون ڈے میں 7 وکٹوں اور دوسرے میں 5 رنز سے فتح حاصل کی تھی۔
