لاہور: انٹرنیشنل کرکٹ کونسل (آئی سی سی) نے پاکستان کرکٹ بورڈ (پی سی بی) کی جانب سے میچ ریفری اینڈی پائی کرافٹ کو ہٹانے کی درخواست مسترد کر دی ہے اور پی سی بی کو اس فیصلے سے آگاہ کر دیا گیا ہے۔
آئی سی سی نے پاکستان کے اس مؤقف کو تسلیم نہیں کیا کہ میچ ریفری نے بھارتی ٹیم کے دباؤ میں متنازع اقدام کیا۔ عالمی ادارے کے مطابق گراؤنڈ میں موجود ایشین کرکٹ کونسل (اے سی سی) کے رکن نے ہی پائی کرافٹ کو “ہینڈ شیک” نہ کرنے کی ہدایت دی تھی۔
پاکستان کے میچز کے لیے الگ میچ ریفری کی تجویز
میڈیا رپورٹس کے مطابق پائی کرافٹ کو پورے ایشیا کپ سے ہٹانے کے بجائے صرف پاکستان کے میچز سے الگ کرنے پر غور کیا جا رہا ہے۔ اس حوالے سے امکان ہے کہ سابق ویسٹ انڈین کرکٹر رچی رچرڈسن پاکستان کے میچز میں بطور میچ ریفری ذمہ داریاں نبھائیں گے۔
پی سی بی کا لائحہ عمل
پاکستان کرکٹ بورڈ نے مستقبل کی حکمت عملی کے لیے حکومت سے مشاورت کا فیصلہ کیا ہے اور اس مقصد کے لیے اہم اجلاس طلب کر لیا گیا ہے۔ ذرائع کے مطابق پی سی بی پاکستان ٹیم کے میچز سے متعلق اہم فیصلے اعلیٰ حکام کی مشاورت کے بعد کرے گا۔
تنازع کی اصل وجہ
یاد رہے کہ پاک-بھارت میچ کے دوران میچ ریفری اینڈی پائی کرافٹ نے کپتان سلمان آغا کو حریف کھلاڑی سے ہاتھ ملانے سے روک دیا تھا، جس پر پی سی بی نے اعتراض اٹھایا تھا۔