بھارتی کرکٹ ٹیم کے سابق کپتان اور 1983 ورلڈکپ فاتح کپتان کپل دیو نے بورڈ اور ٹیم کو شدید تنقید کا نشانہ بنایا ہے۔ ان کا کہنا ہے کہ کرکٹ کو سیاسی معاملات سے دور رکھا جانا چاہیے۔
بھارتی میڈیا کو دیے گئے ایک انٹرویو میں کپل دیو نے کہا کہ جب حکومت نے کھیلنے کی اجازت دے دی ہے تو پھر کھلاڑیوں کا ہاتھ ملانے سے انکار کرنا کوئی بڑی بات نہیں ہونی چاہیے۔
انہوں نے کہا کہ یہ فطری بات ہے کہ کھلاڑیوں کے دل میں اپنے ملک کے لیے جذبات ہوتے ہیں، لیکن ان جذبات کی وجہ سے کھیل کی روح اور اسپورٹس مین اسپرٹ متاثر نہیں ہونی چاہیے۔ کھیل کے لیے جو بات بہتر نہ ہو، اسے ختم کرکے آگے بڑھنا چاہیے۔
سابق کپتان کا کہنا تھا کہ میری صرف اتنی گزارش ہے کہ کھلاڑیوں اور میڈیا دونوں کی ذمہ داری ہے کہ کھیل کو سیاست سے الگ رکھا جائے۔
یاد رہے کہ بھارت نے ایشیا کپ کے فائنل میں پاکستان کو سنسنی خیز مقابلے کے بعد پانچ وکٹ سے شکست دی تھی، تاہم بھارتی ٹیم نے ایشین کرکٹ کونسل کے چیئرمین محسن نقوی سے ٹرافی لینے سے انکار کردیا تھا۔
