لاہور: جنوبی افریقہ کے خلاف ٹیسٹ سیریز کے لیے قومی کرکٹ ٹیم کے سپورٹ اسٹاف میں اضافے کا امکان ہے، جس کا باضابطہ اعلان چیئرمین پی سی بی کی منظوری کے بعد کیا جائے گا۔
ذرائع کے مطابق دو ٹیسٹ میچز پر مشتمل سیریز کے لیے سابق کرکٹر عمران فرحت کو بطور معاون بیٹنگ کوچ شامل کرنے پر غور جاری ہے۔ اس کے علاوہ سپن بولنگ کوچ عبدالرحمان اور فیلڈنگ کوچ عبدالمجید کو بھی ٹیم مینجمنٹ کا حصہ بنانے کی تجویز دی گئی ہے۔
یہ تینوں کوچز اس وقت نیشنل کرکٹ اکیڈمی لاہور میں قومی ٹیسٹ کیمپ کے دوران اپنی خدمات انجام دے رہے ہیں۔ ان کو سپورٹ اسٹاف کا مستقل حصہ بنانے کے حوالے سے حتمی فیصلہ جلد متوقع ہے۔
ذرائع کا کہنا ہے کہ پاکستان اور جنوبی افریقہ کے درمیان پہلا ٹیسٹ 12 اکتوبر کو لاہور میں جبکہ دوسرا 20 اکتوبر سے راولپنڈی میں کھیلا جائے گا۔ دونوں میچز کے لیے اسپن وکٹیں تیار کرنے پر غور جاری ہے، جس پر ساجد خان، نعمان علی اور آصف آفریدی اہم کردار ادا کر سکتے ہیں۔
