پرتگال کے عالمی شہرت یافتہ لیجنڈ فٹبال اسٹار کرسٹیانو رونالڈو نے ایک بار پھر اپنی برتری ثابت کرتے ہوئے مسلسل تیسری مرتبہ مشرقِ وسطیٰ کے بہترین فٹبالر آف دی ایئر کا اعزاز حاصل کر لیا ہے۔
تفصیلات کے مطابق یہ اعزاز رونالڈو کو دبئی میں منعقد ہونے والی گلوب سوکر ایوارڈز کی تقریب کے دوران دیا گیا، جہاں انہوں نے کریم بنزیما، سالم الدوسری اور ریاض محرز جیسے نامور کھلاڑیوں کو پیچھے چھوڑا۔
سال 2025 کے دوران کرسٹیانو رونالڈو نے تمام مقابلوں میں مجموعی طور پر 40 گول اسکور کیے، جو ان کی شاندار فارم، محنت اور مستقل کارکردگی کا واضح ثبوت ہیں۔ 40 سال کی عمر میں بھی ان کی فٹنس اور کھیل سے وابستگی نوجوان کھلاڑیوں کے لیے مثال بنی ہوئی ہے۔
رونالڈو اس وقت سعودی عرب کے معروف فٹبال کلب النصر کی نمائندگی کر رہے ہیں اور ان کا معاہدہ 2027 کے وسط تک جاری رہے گا۔ ایوارڈ وصول کرتے وقت انہوں نے اپنی جذباتی تقریر میں کہا کہ مزید کھیلنا آسان نہیں ہوتا، تاہم ان کا جذبہ بدستور بلند ہے اور وہ آنے والے عرصے میں بھی اعلیٰ سطح پر کھیلنے کے لیے تیار ہیں۔
