غزہ: (آوازنیوز) غزہ میں اسرائیلی فورسز کی بربریت کا سلسلہ جاری رہا، کئی بچوں سمیت مزید 23 فلسطینی شہید ہو گئے۔اسرائیلی فورسز کی بمباری سے 24 گھنٹے کے دوران مزید 23 فلسطینی شہید اور 124 زخمی ہوئے، شہدا کی مجموعی تعداد 52 ہزار 860 ہوگئی،1 لاکھ 19 ہزار 470 فلسطینی زخمی ہوچکے ہیں۔غزہ میں ادویات سمیت تمام اشیا کے داخلے پر پابندی ہے، اسرائیلی شہریوں نے حکومت مخالف احتجاج کیا، غزہ جنگ بندی کا مطالبہ کیا گیا، تل ابیب میں ہزاروں اسرائیلی شہری سڑکوں پر نکل آئے، یرغمالیوں کی رہائی کا مطالبہ کیا۔مظاہرین نے کہا کہ ہمارا اصل دشمن حماس نہیں بلکہ وزیر اعظم نیتن یاہو ہے۔دوسری طرف حماس نے امریکی اسرائیلی فوجی عیدن الیگزینڈر کو کل چھوڑنے کا اعلان کیا ہے جس کا قطر اور امریکی ایلچی نے خیر مقدم کیا ہے۔حماس کے وفد کے سربراہ نے ایک بیان میں کہا ہے کہ جنگ بندی، گزرگاہیں کھولنے اور غزہ کی پٹی میں ہمارے عوام کے لیے امداد اور ریلیف کی فراہمی کے لیے کی جانے والی کوششوں کے تحت اسرائیلی ، امریکی دوہری شہریت کے حامل فوجی کو رہا کیا جائے گا۔انہوں نے زور دیا ہے کہ تحریک فوری طور پر بھرپور مذاکرات شروع کرنے ، جنگ بندی اور قیدیوں کے تبادلے کے حتمی معاہدے تک پہنچنے کے لیے سنجیدہ کوششیں کرنے کے لیے تیار ہے۔
