اسلام آباد (آواز نیوز) پاکستان مسلم لیگ ن کے رہنما اور سینیٹر عرفان صدیقی نے کہا ہے کہ 9 مئی کے مقدمات سیاسی نہیں بلکہ جرائم سے متعلق ہیں اور ایسے واقعات اگر کسی دوسرے ملک میں ہوتے تو نتائج نہایت سنگین ہوتے۔
نجی ٹی وی پروگرام میں گفتگو کرتے ہوئے انہوں نے بھارتی فضائیہ کے سربراہ ائیر چیف مارشل اے پی سنگھ کے اس دعوے کو مضحکہ خیز اور بے بنیاد قرار دیا، جس میں کہا گیا تھا کہ مئی میں ہونے والی 4 روزہ جھڑپ کے دوران پاکستان کے 5 طیارے مار گرائے گئے۔ عرفان صدیقی کے مطابق یہ دعویٰ اتنا کمزور ہے کہ بھارتی وزیراعظم نریندر مودی نے بھی اپنی ڈیڑھ گھنٹے سے زائد کی پارلیمانی تقریر میں اس کا ذکر نہیں کیا۔
انہوں نے کہا کہ بھارتی ائیر چیف شاید یہ سمجھتے ہیں کہ ان کے جھوٹ کو سچ مان لیا جائے گا، تاہم زمینی حقائق اس کے برعکس ہیں۔ انہوں نے مزید کہا کہ بھارتی ریاست بہار میں انتخابات قریب ہیں اور اگر بی جے پی وہاں شکست کھا گئی تو اس کی سیاسی پوزیشن مزید کمزور ہو جائے گی۔
ن لیگی سینیٹر نے کہا کہ راہول گاندھی نے حالیہ انتخابات میں دھاندلی کے شواہد پیش کیے ہیں، جو بھارتی تاریخ میں پہلی بار ہوا ہے، اور اس سے بی جے پی کی ساکھ کو شدید نقصان پہنچا ہے۔ پہلگام واقعے پر بھی کسی ملک نے بھارتی مؤقف کی تائید نہیں کی، جو بھارت کی سفارتی ناکامی ہے۔
9 مئی کے مقدمات پر بات کرتے ہوئے انہوں نے کہا کہ سزا یافتہ افراد کو اپیل کا حق حاصل ہے اور بھارت، امریکا یا برطانیہ میں اگر کوئی جماعت ایسے واقعات میں ملوث ہوتی تو اس کے نتائج بہت سنگین ہوتے۔
