اسلام آباد: قومی اسمبلی نے روٹین کا ایجنڈا معطل کرتے ہوئے انسداد دہشتگردی ترمیمی بل 2024 کثرتِ رائے سے منظور کرلیا۔ اسپیکر ایاز صادق کی زیر صدارت اجلاس میں جے یو آئی رکن عالیہ کامران نے بل کی جلدبازی پر سوال اٹھایا، تاہم حکومتی اراکین کی اکثریت نے بل کی حمایت کی۔
حمایت میں 125 ووٹ آئے جبکہ مخالفت میں 45 ووٹ ڈالے گئے۔ اپوزیشن نے گنتی کو چیلنج کیا اور منظوری کے دوران شدید احتجاج اور نعرے بازی کی۔
بل کو ہنگامی بنیادوں پر ایجنڈے میں شامل کیا گیا، وزیر مملکت برائے داخلہ طلال چوہدری نے قومی اسمبلی رولز معطل کرنے کی تحریک پیش کی اور پھر بل کو منظوری کے لیے پیش کیا۔
ترمیم کے تحت انسداد دہشتگردی ایکٹ میں اہم تبدیلیاں کی جائیں گی تاکہ سیکیورٹی چیلنجز سے فوری طور پر نمٹا جا سکے۔
