اسلام آباد (آواز نیوز) – وزیراعظم شہباز شریف نے کہا ہے کہ چین اور پاکستان کی دوستی دنیا میں منفرد مقام رکھتی ہے اور حکومت اس رشتے کو مزید مضبوط اور نئی بلندیوں تک لے جانے کی خواہاں ہے۔
یہ بات انہوں نے چینی گارمنٹس کمپنی “چیلنج فیشن پرائیویٹ لمیٹڈ” کے وفد سے ملاقات میں کہی۔ وزیراعظم نے کہا کہ دونوں ممالک ہر مشکل میں ایک دوسرے کے ساتھ کھڑے رہے ہیں، اور اقتصادی تعلقات میں اضافہ باعث اطمینان ہے۔ انہوں نے خواہش ظاہر کی کہ چینی صنعتیں پاکستان میں اپنے یونٹس قائم کریں۔
شہباز شریف نے چیلنج گروپ کے پاکستانی مارکیٹ پر اعتماد کو سراہا اور خصوصی اقتصادی زون کے قیام کا خیر مقدم کیا، ساتھ ہی متعلقہ اداروں کو کمپنی کو تمام سہولیات فراہم کرنے کی ہدایت کی۔
وزیراعظم نے کہا کہ پاکستان سی پیک کے صنعتی حصے کے فروغ کیلئے پرعزم ہے اور ٹیکسٹائل کے شعبے میں چین کی مہارت سے بھرپور فائدہ اٹھانا چاہتا ہے۔ اس ضمن میں جلد چین اور پاکستان کی بزنس ٹو بزنس کانفرنس منعقد کی جائے گی۔
