“وزیراعلیٰ پنجاب مریم نواز کی سیلاب متاثرہ عوام سے فوری محفوظ مقامات پر منتقل ہونے کی اپیل”

لاہور:
وزیراعلیٰ پنجاب مریم نواز شریف نے صوبے میں بڑھتی ہوئی سیلابی صورتحال کے باعث عوام سے اپیل کی ہے کہ وہ اپنی اور اپنے بچوں کی جانوں کو محفوظ بنانے کے لیے فوری طور پر محفوظ مقامات پر منتقل ہو جائیں۔

اپنے پیغام میں وزیراعلیٰ نے کہا کہ جن علاقوں کو سیلاب کا خطرہ لاحق ہے، وہاں کے رہائشی ضلعی انتظامیہ اور ریسکیو اداروں کے ساتھ بھرپور تعاون کریں تاکہ کسی بھی جانی نقصان سے بچا جا سکے۔

انہوں نے کہا کہ عوام کی جان کا تحفظ حکومت پنجاب کی اولین ترجیح ہے۔ گھروں، فصلوں اور مویشیوں کو پہنچنے والے نقصانات کا شفاف تخمینہ لگایا جا رہا ہے اور متاثرہ افراد کو ان کا حق ہر صورت پہنچایا جائے گا۔

مریم نواز نے واضح کیا کہ حکومت پنجاب متاثرہ شہریوں کے ساتھ کھڑی ہے اور تمام نقصانات کا ازالہ کیا جائے گا۔ انہوں نے زور دیتے ہوئے کہا کہ:
“اپنی اور اپنے بچوں کی زندگیوں کی حفاظت کو ترجیح دیں اور بلا تاخیر محفوظ مقامات کی جانب منتقل ہو جائیں۔”