غزہ: اسرائیلی فوج نے غزہ شہر کے مشرقی اور جنوبی حصوں میں جمعرات کی صبح سے مسلسل بمباری کی، جس کے نتیجے میں کم از کم 50 فلسطینی شہید ہو گئے ہیں۔ شہید ہونے والوں میں عورتیں اور بچے بھی شامل ہیں۔
الجزیرہ کے مطابق اسرائیلی افواج غزہ شہر پر مکمل قبضے کی تیاری کر رہی ہیں۔ دوسری جانب اقوام متحدہ اور دیگر عالمی اداروں نے اس کارروائی پر سخت تشویش کا اظہار کیا ہے۔
اقوام متحدہ کے سیکریٹری جنرل انتونیو گوتریس نے خبردار کیا ہے کہ غزہ میں فوجی آپریشن تباہ کن ثابت ہو گا اور لاکھوں شہری مزید بے گھر ہونے پر مجبور ہوں گے۔
غزہ کی سول ڈیفنس ایجنسی نے بتایا ہے کہ اسرائیلی زمینی کارروائی کے دوران زیتون اور شجاعیہ کے علاقوں میں 1500 سے زائد گھر مکمل طور پر تباہ کر دیے گئے ہیں۔ شہریوں نے کہا ہے کہ وہ اپنے گھروں کو چھوڑ کر ساحلی علاقوں میں پناہ لینے پر مجبور ہیں۔
غزہ کی وزارت صحت کے مطابق غذائی قلت کے باعث مزید 4 فلسطینی شہید ہوئے، جن میں 2 بچے بھی شامل ہیں۔ بھوک سے جاں بحق ہونے والوں کی تعداد بڑھ کر 317 ہو گئی ہے۔
اعداد و شمار کے مطابق مجموعی طور پر اب تک غزہ میں 62 ہزار 900 سے زائد فلسطینی شہید ہو چکے ہیں، جن میں اکثریت عورتوں اور بچوں کی ہے۔
