اسلام آباد: امریکی جیل میں قید ڈاکٹر عافیہ صدیقی کی صحت اور وطن واپسی سے متعلق کیس میں ایک اور پیش رفت ہوئی ہے، اسلام آباد ہائیکورٹ کا نیا بنچ بھی ٹوٹ گیا۔
جسٹس انعام امین منہاس نے کیس سننے سے معذرت کرتے ہوئے معاملہ چیف جسٹس کو بھجوا دیا تاکہ لارجر بنچ تشکیل دیا جا سکے۔ سماعت کے دوران جسٹس انعام امین منہاس نے ریمارکس دیے کہ “ماسٹر آف روسٹر چیف جسٹس ہیں یا نہیں، اس پر دو آراء موجود ہیں، لہٰذا معاملہ لارجر بنچ طے کرے گا۔”
درخواست گزار ڈاکٹر فوزیہ صدیقی کی جانب سے دائر درخواست میں عافیہ صدیقی کی صحت اور وطن واپسی پر مؤثر اقدامات کرنے کی استدعا کی گئی ہے۔ وکیل عمران شفیق ایڈووکیٹ نے موقف اختیار کیا کہ معاملہ پیچیدہ ہو گیا ہے، تاہم عدالت نے کہا کہ یہ پیچیدہ نہیں بلکہ ماسٹر آف روسٹر کے تعین کا سوال ہے۔
یاد رہے کہ اس سے قبل کیس جسٹس سردار اعجاز اسحاق خان کے پاس تھا، جنہوں نے عدالتی حکم عدولی پر وزیراعظم اور کابینہ کو توہین عدالت کے نوٹس جاری کیے تھے۔ بعد ازاں سنگل بنچ کے تمام کیسز ان سے واپس لے کر جسٹس بابر ستار کی سربراہی میں ٹیکس ڈویژن بینچ کو منتقل کر دیے گئے اور عافیہ صدیقی کیس جسٹس انعام امین منہاس کو بھجوایا گیا تھا۔
