نارووال (نمائندہ خصوصی):
وفاقی وزیر برائے ترقی و منصوبہ بندی احسن اقبال نے کہا ہے کہ حالیہ سیلاب نے پنجاب کی معیشت کو 500 ارب روپے کا نقصان پہنچایا ہے۔
نارووال کے قصبے بھینیاں شریف میں متاثرین سیلاب کو امدادی سامان کی تقسیم کی تقریب سے خطاب کرتے ہوئے انہوں نے بتایا کہ سیلاب کے نتیجے میں پنجاب کی لاکھوں ایکڑ زرعی زمین تباہ ہوگئی، 4.3 فیصد زرعی رقبہ متاثر ہوا جبکہ 45 لاکھ افراد براہِ راست متاثر ہوئے۔
احسن اقبال نے کہا کہ 2025 کا سیلاب ہمیں ایک بار پھر یہ یاد دہانی کراتا ہے کہ موسمیاتی تبدیلی کوئی مستقبل کا خطرہ نہیں بلکہ موجودہ حقیقت ہے۔ ان کا کہنا تھا کہ حکومت اب بیرونی امداد اور قرضوں پر انحصار کرنے کے بجائے خود انحصاری کی پالیسی پر عمل کرے گی۔
وفاقی وزیر نے مزید کہا کہ آج تقسیم کیا جانے والا امدادی سامان محض ریلیف نہیں بلکہ یکجہتی اور امید کا پیغام ہے۔
دوسری جانب ریلیف کمشنر پنجاب کے مطابق، شدید سیلابی صورتحال سے 4 ہزار 700 دیہات متاثر اور 104 افراد جاں بحق ہو چکے ہیں۔ زرعی محکموں کا مشترکہ اجلاس بھی طلب کیا گیا ہے تاکہ نقصانات کا تفصیلی جائزہ لیا جا سکے۔
محکمہ موسمیات نے خبردار کیا ہے کہ کل سے مون سون کے گیارہویں اسپیل کا آغاز ہوگا، جس کے باعث پنجاب کے بالائی علاقوں میں مزید بارشوں اور ندی نالوں میں طغیانی کا خدشہ ہے۔
