اسلام آباد: قومی ایئر لائن (پی آئی اے) نے برطانیہ کے لیے اپنا فضائی آپریشن بحال کرنے کا اعلان کر دیا۔ پی آئی اے کا برطانیہ کے لیے فلائٹ آپریشن 25 اکتوبر 2025 سے شروع ہوگا۔
ترجمان پی آئی اے کے مطابق پہلے مرحلے میں اسلام آباد سے مانچسٹر کے لیے ہفتے میں دو پروازیں چلائی جائیں گی۔ یہ پروازیں ہفتے اور منگل کے روز آپریٹ ہوں گی۔
شیڈول کے مطابق، پی آئی اے کی پرواز اسلام آباد سے دوپہر 12 بجے روانہ ہوگی اور شام 5 بجے مانچسٹر پہنچے گی۔ واپسی کی پرواز شام 7 بجے مانچسٹر سے روانہ ہو کر صبح 7 بجے اسلام آباد پہنچے گی۔
ترجمان نے بتایا کہ مانچسٹر کے بعد دوسرے مرحلے میں لندن کے لیے پروازیں بھی شروع کی جائیں گی۔ بکنگ کا عمل شروع ہو چکا ہے اور مسافروں کے لیے انتہائی موزوں کرایہ متعارف کرایا گیا ہے۔
پی آئی اے کے مطابق اب ہم وطن صرف 8 گھنٹوں میں اپنی منزل پر پہنچ سکیں گے، جب کہ پہلے انہیں 15 گھنٹے لگتے تھے۔ ترجمان نے کہا کہ پانچ سال بعد یہ روٹ دوبارہ شروع ہونا پی آئی اے کے لیے ایک بڑی کامیابی ہے۔
وزیر دفاع خواجہ آصف نے سماجی رابطے کی ویب سائٹ ایکس پر اپنے بیان میں کہا کہ “اللہ کے فضل سے یہ مشکل وقت ختم ہو رہا ہے، 25 اکتوبر سے اسلام آباد سے مانچسٹر کے لیے دو ہفتہ وار پروازیں شروع ہو رہی ہیں۔”
انہوں نے مزید کہا کہ “پی ٹی آئی حکومت کے دور میں پی آئی اے پر جو پابندیاں لگیں، وہ اب ختم ہونے جا رہی ہیں۔”
