قاہرہ — حماس، اسرائیل اور امریکی وفود آج مصر کے شہر شرم الشیخ میں غزہ منصوبے کے عملدرآمد کے حوالے سے مذاکرات کے لیے جمع ہو رہے ہیں۔ امریکی صدر ڈونلڈ ٹرمپ نے مذاکرات کاروں پر زور دیا ہے کہ وہ غزہ پٹی میں تقریباً دو سال سے جاری جنگ کو جلد ختم کریں۔
ٹرمپ کے روڈ میپ پر حماس اور اسرائیل نے قیدیوں کے تبادلے اور لڑائی ختم کرنے کے معاملے پر مثبت رجحان کا اظہار کیا ہے، البتہ تفصیلی شرائط ابھی حتمی ہونے باقی ہیں۔ حماس کے ایک سینئر عہدے دار نے کہا ہے کہ تنظیم جنگ بندی اور فوری قیدی تبادلے کے آغاز کے لیے پرعزم ہے، جب کہ اسرائیلی وزیراعظم بنیامین نتن یاہو نے امید ظاہر کی کہ قیدیوں کی رہائی چند دنوں میں ممکن ہو سکتی ہے۔
ٹروتھ سوشل پر ٹرمپ نے مذاکرات کو ’تیزی سے آگے بڑھنے والا‘ قرار دیا اور کہا کہ پہلا مرحلہ اسی ہفتے مکمل ہو جانا چاہیے۔ امریکی جانب سے خصوصی ایلچی سٹیو وٹکوف اور جیرڈ کوشنر سمیت نمائندے معاہدہ حتمی شکل دینے کے لیے مصر روانہ کیے گئے ہیں۔
حماس نے بھی مرکزی مذاکرات کار خلیل الحیہ کی قیادت میں وفد مصر بھیج دیا۔ امریکہ، مصر اور قطر کی سابق ثالثی کوششوں کے بعد متعدد ممالک کے وزرائے خارجہ نے تازہ سفارتی پیش رفت کو ایک “حقیقی موقع” قرار دیا ہے تاکہ پائیدار جنگ بندی ممکن بنائی جا سکے۔
امریکی وزیر خارجہ مارکو روبیو نے مذاکرات سے قبل اسرائیل پر زور دیا کہ وہ غزہ پر بمباری روک دے، کیونکہ فضائی حملوں کے دوران یرغمالیوں کی رہائی ممکن نہیں۔ حماس کے قریب ذرائع کے مطابق عسکریت پسند اپنی کارروائیاں روکنے کے لیے تیار ہیں بشرطیکہ اسرائیل اپنی کارروائیاں معطل کرے۔
ٹرمپ کے منصوبے میں قیدیوں کے تبادلے کے بعد اگلا مرحلہ اسرائیلی فوج کے انخلا کے لیے حالات پیدا کرنا بھی شامل ہے؛ منصوبے کے مطابق 72 گھنٹوں کے اندر زندہ قیدیوں اور شہید شدہ قیدیوں کی لاشوں کی حوالگی شامل ہے۔
نوٹ: سات اکتوبر کے حملے کے بعد فلسطینی حریت پسندوں نے 251 اسرائیلیوں کو یرغمال بنایا تھا جن میں سے 47 اب بھی غزہ میں ہیں جبکہ اسرائیلی فوج کے مطابق 25 قیدی جاں بحق ہو چکے ہیں۔ مبینہ طور پر اسرائیل کے بدلے میں عمر قید یافتہ 250 فلسطینی اور جنگ کے دوران گرفتار کیے گئے 1700 سے زائد افراد کی رہائی متوقع ہے۔
