اسلام آباد: وزیراعظم شہباز شریف نے ملکی صنعتی پیداوار میں اضافے کے لیے پاور ڈویژن کو جامع اور مؤثر پالیسی سفارشات تیار کرنے کی ہدایت دی ہے۔
وزیراعظم کی زیرِ صدارت پاور ڈویژن کے اصلاحاتی ایجنڈے اور ملک میں بجلی کی پیداوار کے مؤثر استعمال پر جائزہ اجلاس منعقد ہوا۔
اجلاس میں پاور ڈویژن کے حکام نے وزیراعظم کو اصلاحاتی پیکج اور پالیسی سفارشات پر تفصیلی بریفنگ دی۔
شہباز شریف نے وفاقی وزارتِ توانائی کو ہدایت دی کہ بجلی کے مؤثر استعمال سے صنعتی اور زرعی پیداوار بڑھانے کے لیے جامع حکمتِ عملی تیار کی جائے۔
انہوں نے کہا کہ سرمایہ کاروں اور صنعت کاروں کی سہولت کے لیے پاور ڈویژن کو قابلِ عمل سفارشات مرتب کرنی چاہئیں تاکہ معیشت کو استحکام مل سکے۔
وزیراعظم نے اس بات پر زور دیا کہ زراعت اور صنعت دونوں شعبوں کو زیادہ سے زیادہ سہولت فراہم کرنا حکومت کی اولین ترجیحات میں شامل ہے، اور بجلی کی پیداوار کا بہترین استعمال ملکی ترقی کے لیے ناگزیر ہے۔
اجلاس میں وفاقی وزیر برائے توانائی سردار اویس خان لغاری، وفاقی وزیر برائے اطلاعات و نشریات عطاء اللہ تارڑ، وفاقی وزیر برائے اکنامک افیئرز ڈویژن احد خان چیمہ، مشیر برائے صنعت ہارون اختر اور دیگر اعلیٰ سرکاری حکام نے شرکت کی۔
شہباز شریف نے واضح کیا کہ اگر بجلی کی پیداوار کا موثر اور منظم استعمال کیا جائے تو نہ صرف صنعتی مصنوعات بلکہ زرعی پیداوار میں بھی خاطر خواہ اضافہ ممکن ہے، جو ملکی برآمدات میں بہتری کا باعث بنے گا۔
