اسلام آباد: وفاقی وزیرِ داخلہ محسن نقوی نے کہا ہے کہ پاکستان کی سرزمین سے فتنہ الہندوستان کا خاتمہ کر کے دم لیں گے اور بھارتی حمایت یافتہ دہشت گردوں کے مذموم عزائم کبھی کامیاب نہیں ہوں گے۔
محسن نقوی کی ملاقات گورنر خیبرپختونخوا فیصل کریم کنڈی سے ہوئی، جس میں صوبے میں امن و امان، حالیہ دہشت گردی کے واقعات، مختلف اضلاع میں فتنہ الخوارج کے خلاف جاری آپریشنز اور پاک افغان موجودہ صورتحال پر تفصیلی تبادلۂ خیال کیا گیا۔
اجلاس میں خیبرپختونخوا میں امن کے قیام اور فتنہ الہندوستان کے خلاف کامیاب آپریشنز پر سکیورٹی فورسز کو خراجِ تحسین پیش کیا گیا، جبکہ پولیس ٹریننگ سینٹر اور نادرا آفس ڈیرہ اسماعیل خان پر حملوں کے شہداء کو خراجِ عقیدت بھی پیش کیا گیا۔
وزیرِ داخلہ نے کہا کہ خیبرپختونخوا کے عوام اور قانون نافذ کرنے والے اداروں نے بہادری سے دہشت گردی کے ناسور کا مقابلہ کیا، اور درندہ صفت عناصر کے خلاف آپریشنز جاری رہیں گے۔ وفاقی حکومت صوبے کو امن و امان کے قیام اور انسدادِ دہشت گردی کے لیے بھرپور تعاون فراہم کر رہی ہے۔
گورنر فیصل کریم کنڈی نے کہا کہ خیبرپختونخوا کے لوگ امن کے داعی ہیں اور صوبے کی ترقی و خوشحالی کے لیے قیامِ امن ناگزیر ہے؛ انہوں نے کہا کہ دہشت گردوں کے خلاف انٹیلی جنس بیسڈ آپریشنز ضروری ہیں۔
