اسلام آباد:ترجمان دفترِ خارجہ طاہر اندرانی نے کہا ہے کہ پاکستان افغانستان کے ساتھ مزید کشیدگی نہیں چاہتا۔ہفتہ وار نیوز بریفنگ کے دوران ترجمان دفترِ خارجہ نے بتایا کہ وزیراعظم شہباز شریف نے اعلیٰ سطحی وفد کے ہمراہ سعودی عرب کا دورہ کیا، جہاں انہوں نے ریاض میں منعقدہ فیوچر انویسٹمنٹ انیشیٹیو کانفرنس میں شرکت کی۔ترجمان کے مطابق وزیراعظم نے سعودی ولی عہد شہزادہ محمد بن سلمان سے ملاقات کی، جبکہ نائب وزیراعظم اسحاق ڈار نے سعودی وزیرِ دفاع سے اہم گفتگو کی۔طاہر اندرانی نے مزید کہا کہ پاکستان نے ہمیشہ خطے میں امن و استحکام کو ترجیح دی ہے، اور توقع ہے کہ افغانستان بھی اپنی سرزمین پاکستان کے خلاف استعمال نہیں ہونے دے گا۔انہوں نے واضح کیا کہ پاکستان اپنے ہمسایہ ملکوں کے ساتھ اچھے تعلقات کا خواہاں ہے اور کسی قسم کی کشیدگی بڑھانے کے حق میں نہیں ہے۔
