بیجنگ:چین نے اعلان کیا ہے کہ وہ پاکستانی خلا بازوں کو اپنے خلائی اسٹیشن کے ایک مختصر مدت کے مشن میں شامل کرے گا، جہاں وہ چینی خلا بازوں کے ہمراہ خلا میں تجربات اور آپریشنز انجام دیں گے۔چینی خبر رساں ادارے شِنہوا کے مطابق، یہ فیصلہ چائنا مینڈ اسپیس ایجنسی (CMSA) کے ترجمان نے پریس کانفرنس کے دوران کیا۔ترجمان کے مطابق، پاکستانی خلا باز چینی خلا بازوں کے ساتھ تربیت حاصل کریں گے اور مشن کے دوران سائنسی تجربات اور آپریشنل سرگرمیوں میں حصہ لیں گے۔چینی جریدے گلوبل ٹائمز نے رپورٹ کیا کہ پاکستانی خلا باز مشن عملے کے ساتھ معمول کے فرائض بھی انجام دیں گے، جو دونوں ممالک کے سائنسی اور تکنیکی تعلقات میں ایک نئے باب کا آغاز ہے۔یہ اعلان اُس معاہدے کے بعد سامنے آیا ہے جو مارچ 2025 میں سپارکو (SUPARCO) اور چائنا مینڈ اسپیس ایجنسی کے درمیان طے پایا تھا۔معاہدے کے مطابق، چین پاکستان کے پہلے انسان بردار خلائی مشن کو اپنے خلائی اسٹیشن کے ذریعے لانچ کرے گا۔وزیراعظم شہباز شریف نے اس موقع پر کہا تھا کہ یہ معاہدہ چین کی جانب سے ایک قابلِ قدر قدم ہے جو پاکستان اور چین کے درمیان خلائی ٹیکنالوجی کے شعبے میں تعاون کو مزید مضبوط بنائے گا۔یاد رہے کہ 19 اکتوبر 2025 کو پاکستان کی خلائی ایجنسی سپارکو نے چین کے لانچ سینٹر سے پاکستان کا پہلا ہائپر اسپیکٹرل سیٹلائٹ (HS-1) خلا میں کامیابی سے بھیجا تھا۔یہ سیٹلائٹ جدید ہائپر اسپیکٹرل امیجنگ ٹیکنالوجی سے لیس ہے، جو زمین اور فضا کے رنگی بینڈز کا تفصیلی تجزیہ کر کے ماحولیاتی، زراعتی اور سائنسی تحقیق میں مدد فراہم کرے گا۔
