اسلام آباد:افغان ریاست سے منسلک سوشل میڈیا ہینڈلز پر پاکستان مخالف پروپیگنڈے میں مسلسل اضافہ دیکھا جا رہا ہے، جسے روکنے میں افغان عبوری حکومت مکمل طور پر ناکام نظر آتی ہے۔
تحقیقات سے پتا چلا ہے کہ افغان اسٹیٹ نیوز پیپرز ڈیپارٹمنٹ کے سرکاری سوشل میڈیا ہینڈل کو خاموشی کے ساتھ “افغان ڈیفنس” کے عنوان سے تبدیل کر دیا گیا، جسے اب براہ راست پاکستان کے خلاف پروپیگنڈا پھیلانے کے پلیٹ فارم کے طور پر استعمال کیا جا رہا ہے۔
رپورٹ کے مطابق پاکستانی سائبر ماہرین نے اس تبدیلی کو بے نقاب کیا۔ یہ سرکاری ہینڈل پہلے ریاستی معلومات فراہم کرتا تھا، تاہم اب اسے پاکستان کے خلاف منظم ڈیجیٹل آپریشن کا حصہ بنا دیا گیا ہے۔
مزید یہ کہ اسلام آباد پر حملوں کے اشارے دینے والی متعدد پوسٹس بھی انہی ریاستی شناخت رکھنے والے افغان اکاؤنٹس سے جڑی ہوئی پائی گئی ہیں، جو خطے میں کشیدگی کو بڑھانے کی کوشش قرار دی جا رہی ہے۔
رپورٹ میں یہ بھی انکشاف ہوا کہ افغان عبوری حکومت کا سرکاری X ہینڈل اپنی روایتی ذمہ دارانہ پیغام رسانی سے ہٹ کر کھلے عام پروپیگنڈے اور دھمکی آمیز مواد نشر کرنے کے محاذ پر آچکا ہے۔ تبدیل شدہ سرکاری اکاؤنٹ اب باقاعدہ ایک ڈیجیٹل پروپیگنڈا مشین کے طور پر کام کر رہا ہے جس میں اسلام آباد کو دھماکوں سے نشانہ بنانے کی دھمکیاں بھی شامل ہیں۔
