اسلام آباد:پی ٹی آئی کے بانی عمران خان کی بہن علیمہ خان نے صوبائی محکمہ داخلہ اور آئی جی جیل خانہ جات پنجاب کو خط لکھ کر اپنے بھائی کی صحت اور حفاظت کے حوالے سے شدید خدشات کا اظہار کیا ہے۔
ایکسپریس نیوز کے مطابق علیمہ خان نے اپنے خط میں کہا کہ 4 نومبر کے بعد اہل خانہ کو عمران خان سے کوئی ملاقات نہیں ملی۔ انہوں نے فوری طور پر اہل خانہ اور وکلا کو ان سے ملاقات کی اجازت دینے کا مطالبہ کیا۔
خط میں مزید کہا گیا کہ بین الاقوامی میڈیا رپورٹس میں عمران خان کی سکیورٹی پر سوالات اٹھائے جا رہے ہیں اور ان کی حراستی صورتحال اور صحت پر وضاحت طلب کی جاتی ہے۔ علیمہ خان نے پنجاب حکومت سے درخواست کی کہ وہ عمران خان کی خیریت اور حراست کی تفصیلات پر فوری جواب فراہم کرے۔
انہوں نے زور دیا کہ عوام میں پیدا ہونے والی شدید تشویش کو مدنظر رکھتے ہوئے عمران خان کی صحت اور حفاظت کے حوالے سے مکمل شفافیت یقینی بنائی جائے۔
