اسلام آباد:
خصوصی جج سینٹرل ارجمند شاہ نے توشہ خانہ ٹو کیس کا فیصلہ سناتے ہوئے بانی پی ٹی آئی عمران خان اور ان کی اہلیہ بشریٰ بی بی کو 17، 17 سال قید کی سزا سنا دی۔ فیصلہ اڈیالہ جیل میں دونوں ملزمان کی موجودگی میں سنایا گیا۔
عدالتی فیصلے کے مطابق عمران خان کو دفعہ 409 تعزیراتِ پاکستان کے تحت 10 سال جبکہ انسدادِ بدعنوانی ایکٹ کے تحت 7 سال قید کی سزا دی گئی۔ بشریٰ بی بی کو بھی مجموعی طور پر 17 سال قید کی سزا سنائی گئی ہے۔ دونوں ملزمان پر فی کس 1 کروڑ 64 لاکھ 25 ہزار 650 روپے جرمانہ بھی عائد کیا گیا ہے، جرمانہ ادا نہ کرنے کی صورت میں مزید 6، 6 ماہ قید بھگتنا ہوگی۔
تحریری فیصلے میں کہا گیا ہے کہ استغاثہ اپنے الزامات ثابت کرنے میں کامیاب رہا، جبکہ ملزمان جرم کے مرتکب پائے گئے۔ عدالت نے سزا سناتے وقت عمران خان کی عمر اور بشریٰ بی بی کے خاتون ہونے کو مدنظر رکھتے ہوئے کم سے کم سزا دی۔ حوالات میں گزارا گیا عرصہ بھی سزا میں شامل کیا گیا ہے۔
