واشنگٹن/ابوجا: امریکی صدر ڈونلڈ ٹرمپ نے کہا ہے کہ امریکا نے کرسمس کے دن نائجیریا میں داعش (اسلامک اسٹیٹ) کے ٹھکانوں کو نشانہ بناتے ہوئے فضائی حملے کیے، جن میں تنظیم کے متعدد جنگجو مارے گئے۔ یہ کارروائیاں نائجیریا کے شمال مغربی علاقے میں انجام دی گئیں۔
نائجیریا کی وزارت خارجہ نے جمعے کے روز ان حملوں کی تصدیق کرتے ہوئے بتایا کہ یہ دہشت گردوں کے خلاف “درست اور ہدفی حملے” تھے، جو نائجیریا حکومت کی درخواست پر کیے گئے۔ وزارت خارجہ کے مطابق ان کارروائیوں کا مقصد شدت پسند عناصر کے نیٹ ورک کو کمزور کرنا تھا۔
امریکی محکمہ دفاع کے ذیلی ادارے یو ایس افریقہ کمانڈ (AFRICOM) کے مطابق فضائی حملے صوبہ سوکوٹو میں کیے گئے، تاہم ہلاک ہونے والے داعش جنگجوؤں کی درست تعداد ظاہر نہیں کی گئی۔
صدر ڈونلڈ ٹرمپ نے سوشل میڈیا پر جاری بیان میں کہا کہ انہوں نے پہلے ہی خبردار کیا تھا کہ اگر نائجیریا میں مسیحیوں پر حملے بند نہ کیے گئے تو امریکا سخت کارروائی کرے گا۔ ان کے مطابق یہ فضائی حملے اسی تنبیہ کے بعد کیے گئے ہیں۔
