قومی بیانیے کی تشکیل اور فروغ کے لیے قائم قومی پیغامِ امن کمیٹی (این پی اے سی) نے جی ایچ کیو میں ڈی جی آئی ایس پی آر سے ملاقات کی، جس میں ملکی سلامتی، قومی وحدت اور ریاستی بیانیے کے تحفظ پر تفصیلی گفتگو کی گئی۔
ملاقات میں پاک افواج سے غیر متزلزل یکجہتی کا اظہار کیا گیا اور ریاست دشمن بیانیوں کے خلاف مشترکہ عزم دہرایا گیا۔ این پی اے سی نے فتنہ الخوارج، ٹی ٹی پی اور افغان طالبان کی کھلے الفاظ میں مذمت کرتے ہوئے کہا کہ دہشت گردی کسی بھی صورت قابلِ قبول نہیں۔
ڈی جی آئی ایس پی آر کے مطابق اجلاس میں داخلی سلامتی کے امور، خاص طور پر فتنہ الخوارج اور ٹی ٹی اے کے تناظر میں خطرات پر جامع تبادلہ خیال ہوا اور ایک مضبوط مشترکہ مؤقف سامنے آیا۔ انہوں نے کہا کہ کشمیر اور غزہ پر پاکستان کا اصولی موقف اور مظلوموں کی حمایت ہماری اخلاقی ذمہ داری ہے۔
این پی اے سی نے اعلان کیا کہ ملک بھر میں منبر و محراب کے ذریعے اتحادِ امت، سماجی ہم آہنگی اور آئینی برابری کا پیغام عام کیا جائے گا، جبکہ نفرت انگیزی، فرقہ واریت اور تکفیری سوچ کے خلاف زیرو ٹالرنس پالیسی اپنائی جائے گی۔
ڈی جی آئی ایس پی آر نے کہا کہ دشمن کی نفسیاتی جنگ کے مقابلے کے لیے عوامی شعور اور سچ پر مبنی قومی بیانیہ سب سے مؤثر ہتھیار ہے۔ اس مقصد کے لیے مساجد، مدارس اور جامعات میں آگاہی نشستیں بڑھانے کی تجویز دی گئی۔
ملاقات کو غیر معمولی طور پر مفید قرار دیتے ہوئے فریقین نے اعتماد سازی اور عملی تعاون کے نئے راستے کھلنے کی امید ظاہر کی۔
